Um fótbóltin ... ...

 

Sjálvt um tað var kappróðurin, sum í síni tíð setti ferð á tankarnar um eitt ítróttarfelag á Skála, er tað í dag fótbólturin, sum er einasta ítróttargreinin hjá felagnum. Í kreppuárunum varð gjørt av at skilja fótbólt og kappróðurin sundur í tvey feløg og soleiðis er skipanin enn.

 

Tá felagið var stovnað, spældu skáladreingir, t. d. Hans Jákup Andreasen, Sørin Christiansen, Asbjørn Mikkelsen og aðrir góðir menn, fótbólt, men teir sluppu ikki at taka lut í landskappingini.

 

Seinni sluppu garparnir, sum í síni tíð løgdu lunnarnar undir skipaða fótbóltin í bygdini, at royna seg í landskappingini og tað var um reppið, at Skála longu fyri nógvum árum síðani endaði í bestu deildini. Men tað miseydnaðist og tí skuldi drúgv tíð ganga til Skála vann sær innivist millum tey bestu liðini.

 

Sjálvt um menninir sum í dag fara við umtaluni í fótbólti, eru tað kvinnurnar sum hava gjørt mest um seg. Í 1990 gjørdust tær føroyameistarar á fyrsta sinni og tvey ár seinni endurtóku tær bragdið, samstundis sum tær vunnu steypakappingina. Tí hevur Skála longu vunnið eina greipu í fótbólti. Eisini í yngru deildunum hava kvinnurnar gjørt nakað um seg. Gentur 10-12 gjørdust føroyameistarar í 2002 og 2003 og pinkurnar hava vunnið tríggjar ferðir, í 1992, 2002 og 2003.

 

Menninir mangla enn at vinna tað heilt stóra. Fjórða deild vann í 1985 og í 2002 og triðja deild vann í 1998 og 2000. Í 2001 framdu menninir tó tað bragd, at liðið leikti seg upp í bestu deildina umvegis eitt annað pláss í aðru deild og kvalifikatiónssigrar á B71. Sjálvt um tvey tey fyrstu árini í bestu deildini vóru ógvuliga tung, tykist liðið nú at hava fótað sær, tí í 2004 endaði liðið á triðja plássi, vann bronsu og rætt til at spæla í Intertoto kappingini.

 

Men tað er eitt kapittul fyri seg...