Um kappróðurin ... ...

 

Tað var kappróðurin, sum í sínari tíð var upprunin til Skála Ítróttarfelag.

 

Fyrstu árini læntu skálamenn Sølmund úr Runavík, men í 1969 varð Skálabáturin, sum í nógv harrans ár var ítróttarligi stoltleikin hjá bygdini, bygdur.

 

Sjálvt um tað fyri mong man tykjast, sum var Skálabáturin einasti báturin hjá felagnum í fleiri áratíggjur, er veruleikin tann, at Svanur bara er nøkur heilt fá ár yngri.

 

Bátar felagsins hava vunnið nógv meistaraheiti og nógvar einstakar róðrar gjøgnum tíðina. Sambært hagtølunum hjá RSF - tey ganga bara aftur til 1973 - hevur Skálabáturin vunnið trý meistaraheiti, nevniliga í 1992, 1993 og í 1994. Stuttligt hevði tó verið at fingið at vita, um báturin hevur verið meistari áðrenn hetta, og í so fall nær.

 

Skálabáturin hevur eisini framt tað bragd, at hann hevur bestu tíð á Ólavsøku síðan 1973. Av teimum sjey bestu tíðunum á Ólavsøku, eigur Skálabáturin tær fýra, har tann besta ljóðar upp á 3.52,00.

 

Svanur varð keyptur í 1975 og longu sama ár vístu kvinnurnar tenn. Tær gjørdu ikki mætari enn at vinna FM-heitið til bygdina og sjálvt um tað framvegis er einasta meistaraheiti í kvinnuróðri telur tað. Dreingirnir vóru - sum altíð - eitt sindur í gongd, men tá glið kom á, steðgaðu teir ikki aftur. Teir vunnu meistaraheitið fýra ár á rað frá 1979 og so aftur í 1984. Og tað eru tey níggju meistaraheitini bátarnir hava vunnið.